Le p’tit quinquin

« Dors min p’tit quinquin,

Min p’tit pouchin,

Min gros rojin ;

Te m’f’ras du chagrin

Si te n’dors point ch’qu’à d’main. » [1]

 

Ainsi l’aut’jour eun’pauv’dintellière,

In amiclotant sin p’tit garchon

Qui, d’puis tros quarts d’heure, n’faijot qu’braire,

Tachot d’l’indormir par eun’ canchon.

Ell’li dijot : « Min Narcisse,

D’main t’aras du pain n’épice,

Du chuc à gogo,

Si t’es sache et qu’te fais dodo. »

 

[orange]au refrain[/orange]

 

« Et si te m’laich’ faire eun’ bonn’ semaine,

J’irai dégager tin biau sarrau,

Tin patalon d’drap, tin giliet d’ laine ...

Comme un p’tit milord te s’ras farau !

J’ t’acat’rai, l’jour de l’ducasse,

Un porichinell’ cocasse,

Un turlututu

Pour juer l’air du capiau-pointu. »

 

[orange]au refrain[/orange]

 

« Nous irons dins l’cour Jeannette-à-Vaques,

Vir les marionnett’s. Comm’ te riras,

Quand t’intindras dire : « Un doup’ pou Jacques ! » [2]

Pa’ l’porichinell’ qui parl’ magas ! [3]

Te li mettras dins s’menotte,

Au lieu d’doupe, un rond d’carotte ! [4]

I t’dira : Merci !

Pins’ comm’ nous arons du plaisi ! »

 

[orange]au refrain[/orange]

 

« Et si par hasard sin maîte s’fâche,

Ch’est alors Narciss’ que nous rirons !

Sans n’n avoir invi’, j’prindrai m’n air mache,

J’li dirai sin nom et ses sournoms,

J’li dirai des fariboles,

I m’in répondra des drôles,

In fin, un chacun

Verra deux pestac’ au lieu d’un ... »

 

[orange]au refrain[/orange]

 

« Allons serr’ tes yeux, dors min bonhomme,

J’vas dire eun’ prière à P’tit-Jésus,

Pour qu’i vienne ichi pindant tin somme,

T’fair’ rêver qu’j’ai les mains plein’s d’écus.

Pour qu’i t’apporte eun’coquille,

Avec du chirop qui guile

Tout l’long d’tin minton ...

Te pourléqu’ras tros heur’s de long ! »

 

[orange]au refrain[/orange]

 

« L’mos qui vient, d’Saint-Nicolas ch’est l’fiête,

Pour sûr, au soir, i viendra t’trouver.

I t’fra un sermon et t’l’aich’ra mette

In d’zous du balot, un grand painnier.

I l’rimplira, si t’es sache,

D’ séquois qui t’rindront bénache,

Sans cha, sin baudet

T’invoira un grand martinet. »

 

[orange]au refrain[/orange]

 

Ni les marionnettes ni l’pain n’épice

N’ont produit d’effet. Mais l’martinet

A vit’ rappajé l’petit Narcisse,

Qui craingnot d’vir arriver l’baudet.

Il a dit s’canchon-dormoire ...

S’mèr’ l’a mis dins s’n ochennoire,

A r’pris sin coussin,

Et répété vingt fos che r’frain ...

 

[orange]au refrain[/orange]